عندما تقابل حب الماضي

في موضوع كده محيرني .. هو الواحد لما يكون بيحب حد ومايحصلش نصيب .. ويسبوا بعض ويتقابلوا صدفة بعدها بوقت كبير أوي .. ايه الاحساس اللي المفروض الواحد يحسه .. هل الاحساس يكون وحش بسبب الخلافات والمشاكل اللي اتسببت في انهم يسبوا بعض.. ولا بيبقى الاحساس حلو لأنهم بيبقوا واحشين بعض .. وبينبسطوا لما بيشوفوا بعض وينسوا كل الوحش اللي ما بينهم ... ويفتكروا أيامهم الحلوة اللي كانوا مع بعض فيها ... والله أنا بجد حيران لأن الاحساسين ضد بعض بس أكيد لكل موقف طريقة معينة وظروف مختلفة. 

الاكل ده مزاج

ناس كتير طبىعا واخدين بالهم أنا قد ايه بهتم بالاكل ... وبحب الاكل أوي أوي اوي ..هو بصراحة الموضوع مش طفاصة .. ده مزاج وكيف عند كل المصريين وتقريبا معظم العرب.. تفكيرهم في الاكل جزء مهم جدا من حياتهم اليومية.. بس مهما الواحد فكر برده هو مش عايز في مصر.. اللي هو بقى التفكير في الاكل على اصوله .. الفول والطعمية السخنة كده مع شوية الجارجير على الفطار.. والغدا بقى طاجن رز معمر كده مع شوية كبده مشوية على طبق المخلل ... وعلى العشا بقى شوية الجبنة الاسطنبولي على البيض بالبسطرمة... حاجة تحفة  وأنا حسيت بالجوع وانا بكتب .

مصر والأزمات

هو مصر لازم على طول تعيش في أزمات كده ماينفعش يبقى كل حاجه فيها مريحة .. يعني فترة ازمة في رغيف العيش .. وطوابير طويله على العيش لدرجة ان في ناس ماتت في الطوابير دي وكأننا في مجاعة... وبعد كده ازمة المواصلات اللي مهما عملنا مالهاش حل... ودلوقتي أنابيب الغاز.. اللي مش موجوده واللي حتى لو موجوده تقف طابور طول اليوم.. يا ترى هو حد بيخطط للأزمات دي ولا مصر فعلا دولة بقت مش لقية رغيف العيش !! ولا الانبوبه !!. دي حاجه غريبة فعلا .  . 

الكورة وقفت الحال

الكورة في مصر وحشتني .. ووحشني الدوري المصري أوي .. وصعبان علي بجد الناس اللي بتاكل عيش من ورا مجال الكورة.. والاصعب انهم مش ناس قليلة دول كتيير أوي .. دول لاعبين ومدربين واعلاميين وعمال ملاعب واداريين.. كل دول حالهم واقف بسبب كارثة بورسعيد اللي جصلت من شهر... طيب الناس دي كلها بتصرف على بيوتها وبتاكل وتشرب منين.. الله يكون في عونهم دول بجد عايشين حياة صعبة اوي ولازم الاجراءات تكون اسرع يمسكوا كل اللي اتسببوا في المصيبة وتقديمهم للمحاكمة بسرعة عشان الدنيا تمشي بقى والكل يبقى تمام انشاء الله.    

كان درس قاسي

الواحد فعلا مش بيتعلم ببلاش وأنا مش عارف ازاي كده جريت ورا واحدة وأنا معرفش عنها حاجة.. والمصيبة الاكبر اني دمرت حياتي ولاغيت كل حاجة عشانها .. بس معلش ماهو انا اللي مغفل ... والحياة كلها كانت غموض في غموض... بس معلش ادينا اتعلمنا الدرس ودرس قاسي اوي كمان .. ولازم بجد الواحد يعرف كل حاجة عن اللي قرر انها تكون شريكت حياته.. والاهم انه يتأكد من مشاعرها نحيته وبلاش يجري ورا اوهام لأن الواقع بيكون اقوى وبتبقى بجد صدمة.     

الغربة بتغير ..!

الواحد مش عارف ليه وايه اللي بيحصله لما بيتغرب عشان خاطر الشغل وانو يكون نفسه ويدور على مستقبله .. الواحد كده بيحصله تجمد في عواطفه وبيفكر بس في لذات الدنيا ومتعتها .. وبيبقى مش عايز يفتكر اي حاجه من الماضي وبيدور دايما على كل حاجة جديدة بعيده عن الماضي .. هو  اللي بيتغرببيتغير كده في شخصيته واسلوبه ربنا يستر لما الواحد يطول كده هيعمل ايه.

مصيبة الكورة

ماتش كورة يتقلب مجزرة ويموت فيه ناس كتيرة كده وغير المصابين كل ده ليه ؟؟ وايه اللي بحصل في مصر أنا كنت بجد مصدوم اوي ومش مصدق ان الواحد يروح يتفرج على كورة عشان يتمتع يرجع متعور او اهلو يستلموا جثته وعايز افهم هو الامن كان فين ... والمسؤولين كانوا فين .. يعني جمهور الفرقة الكسبانة ينزل يعمل كل ده ليه ؟.. بجد حرام .. وبحترم جدا المبادرة اللي قاموا بيها الزمالك والاسماعيلي .. ورفضهم انهم يلعبوا الماتش بجد حركة تدل في نفس الوقت ان احنا ممكن في يوم من الايام نبقى ايد واحدة..