السبت، 31 ديسمبر 2011

باي ..باي .. 2011


كل سنة بتعدي في عمر البني آدم بيبقى ليها بعض الذكريات منها الحلوة ومنها الوحشة ومنها الي مش ممكن تنساها ومنها الي بتبقى مش طايق سيرتها .... وانهارده آخر يوم في سنة 2011 وكل واحد مننا لازم كدة يسترجع شريط 2011 ويفتكر كل لحظاته ويصافيها عشان يدخل 2012 وهو نظيف وابيض كده ومنظف غبار 2011 من عليه... لما كنا صغيرين وبنبدل سنانه كنا بنقول يا شمس يا شموسة خودي سنة الجاموسة وادينا سنة العروسة ... وكل عام وانتم بخير وسنة سعيدة علينا وعلينا وعليكوا انشاء الله.

الثلاثاء، 27 ديسمبر 2011

ضياع الحب بسبب الظروف


طبعا شيء منتشر جدا في بلدنا الحبيبة مصر وفي معظم الدول العربية ومش بس كده تقريبا الموضوع ده موجود في معظم دول العالم قصة الحب الي بتفشل بعد كده بسبب الظروف الي حواليك سواء كانت مادية او غيره ... الاصعب من ان قصة الحب تفشل هو انك تشوف حبيبتك بتروح لغيرك بعد السنين الي قدتوها سوى تحلموا انكوا تكونوا لبعض ومرة واحدة تلاقي الاحلام دي غيرك بيحققها معاها وانت واقف في مكانك بتتفرج بسبب الظروف ... ربنا يستر علينا .

الأحد، 25 ديسمبر 2011

التساهل والتفاهم في الجواز


يعني أنا مش فاهم ليه الاب والام الي عندهم بنت على وش جواز يعقدوا الامور ويصعابوها على الشباب الغلبان الي متبهدل وشاقيان ويحتولوا العقدة في المنشار يا جماعة بقى ستروا بناتكو وعفوا شبابكوا وسهلوها كده والماليان يصب على الفاضي وبلاش نمرده ده البنات على قفه من يشيل وعددهم كبير اوي ... والاحسن نستر ولادنا ويبتدوا مشوارهم واحدة واحدة مش هيجرا حاجة ومش لازم يبدأوا حياتهم بكل الامكانيات يعني كل بييجي  واحدة واحدة... وسهلوها علينا يا عالم وخلي المركب نتمشي. 

الخميس، 22 ديسمبر 2011

فرحنا يا زمالك بقى


يا زمالك أنا بجد خايف اموت قبل ما افرح ببطولة تكسبوها لجماهير النادي الغلابة دول الي بقالهم سنين مافرحوش ... وأذن بقى مالكمش حجة معاكوا مدرب عظيم زي المعلم حسن شحاته ملك افريقيا في 3 دورات ورا بعض ومعاكوا لاعب مخضرم ومحترم زي النجم الكبير احمد  احسن وكمان شيكابالا ومجموعة لاعبي صغيرة في السن و موهوبة يعني مش ناقصنا غير حاجة واحدة بس اللعب بروح عالية والاخلاص لفانلة الزمالك وبالاضافة طبعا للمحبة ما بين افراد الفريق والعمل مصلحة النادي وكفاية بقى كل واحد يعيش لمصلحته الخاصة وبس .. يا رب نفهم ونعقل بقى . 

الثلاثاء، 20 ديسمبر 2011

سامح عشان تعيش سعيد


أهم حاجه في الحب بجد هو التسامح الي بيحب بجد لازم يسامح ومايبقاش قاسي لأن القسوة هتتسبب بعد كدة في كره... والكره ده بقى ممكن يتسبب في الاذى .. عشان كده يا جماعة انا بنصح كل اتنين بيحبوا بعض انهم لو بيحبوا بجد لازم كل واحد يسامح التاني مهما كانت المشكلة الي ما بينهم ... ولما ده يحصل هيلاقوا انهم اتعودوا على انهم يسامحوا باستمرار ومن كتر المسامحة دي هتختفي تماما المشاكل ما بنهم وهتبقى حياتهم احسن بكتير بس اهم الحاجة المسامحة تكون من القلب ولما تحصل المسامحة يتقفل على الموضوع ومايتفتحش تاني ولا يتم المناقشة فيه عشان القلوب تصفى والموضوع يتنسي وكأنه ماحصلش .

الأربعاء، 14 ديسمبر 2011

الي هيديك انهاردة مش هيديك بكرة



يا جماعة ياريت وانتوا بتنتخبوا اختاروا الي تشفوه مناسب ولازم تبقوا فاهمين مش تروحوا تختاروا اسماء كده وخلاص.. ومش عيب ابدا ان الي مش فاهم يسأل الي فاهم ونبطل بقى نوحي لنفسنا ان احنا فهيمة اوي عشان هو ده الي موادينا في داهية .. وملبسنه في الحيط وخلينا نستغل الفرصة في ان احنا نختار الي يمثلنا .. وبلاش بقى اسمع المهازل والمواقف الي انا بسمعها الي بتزعلني وبتخلي راسي في الطين .. وطبعا قصدي على الناس الي بتروح تنتخب مقابل ازازة زيت وشوار رز وانبوبة والكلام ده عيب اوي واحب اقولهم ان الي هيديك انهاردة مش هيديك بكرة... وخلي صوتك من وجهة نظرك والي انت شيفه... 

الي هيديك انهاردة مش هيديك بكرة



يا جماعة ياريت وانتوا بتنتخبوا اختاروا الي تشفوه مناسب ولازم تبقوا فاهمين مش تروحوا تختاروا اسماء كده وخلاص.. ومش عيب ابدا ان الي مش فاهم يسأل الي فاهم ونبطل بقى نوحي لنفسنا ان احنا فهيمة اوي عشان هو ده الي موادينا في داهية .. وملبسنه في الحيط وخلينا نستغل الفرصة في ان احنا نختار الي يمثلنا .. وبلاش بقى اسمع المهازل والمواقف الي انا بسمعها الي بتزعلني وبتخلي راسي في الطين .. وطبعا قصدي على الناس الي بتروح تنتخب مقابل ازازة زيت وشوار رز وانبوبة والكلام ده عيب اوي واحب اقولهم ان الي هيديك انهاردة مش هيديك بكرة... وخلي صوتك من وجهة نظرك والي انت شيفه... 

الأربعاء، 7 ديسمبر 2011

شوف بقى يا معلم المصريين لما تقفل معاهم


أسعد لحظة في حياتي وأنا شايف المصريين وهما ايديهم في ايد بعض عشان الحق والحرية ويرجعوا كرامتهم إلي بتتهان بقالها 30 سنة ....
ودلوقتي بقى لازم نعمل لبكرة ونصلح العقول إلي خوخت وباظت من الجهل وسوء التعليم وانتشار الفساد....
والناس بقى الزبالة إلي بيحاولو يخربو الثورة دول أحب أقولهم لأ وألف لأ يا حبيبي انت وهو ده احنا لحمنا مر أوي وناس جامدة أوي أوي وأديك شوفت بنفسكوا لا نفع معانا جمال ولا مدرعات ولا رششات مية ولا أي حاجة فكل واحد يخليه في حاله أحسن    

الاثنين، 5 ديسمبر 2011


انفخ في صورتنا يارب


أنا نفسي بجد أشوف اللعيب المصري بينجح لما تيجيلو فرصة احتراف خارجي زي اللاعيبة الافارقة ولاد اللزينه دوول...
بس ده صعب اوي يحصل عشان اللاعيبه عندنا مدلعة اوي اوي وكل الي بيحتاجه موجود ليه بقى يتغرب ويسافر ويتبهدل ويصحا بدري للتمرين وحياه المنظمة الي بتتعب اي مصري دي ....
شوف بقى اللاعب الافريقي وحلاوة اللاعب الافريقي في اوروبا بيروح هناك ياكل النجيلة من الفقر والجوع الي شايفو في بلدهم ... و مش بيعمل بقى زي اللاعب المصري ويقول أنا طبق الكشري وحشني اوي ونفسي أكول طبق فول من العربية ولا الكلام ده خالص لان أصلا مش موجود في بلدهم...  يا ريت بقى نبعد عن العاطفة شوية ونركز في طموحنا و أحلامنا ... هو طبعا ده في المشمش بس خلينا نحاول يمكن نروح كأس العالم إلي مش بنشوفه إلا في التلفزيون .. والله أنا خايف يتلغي قبل ما نروحه